Мен үлкенмін, сен —топас!

Уа,  блогсүйер әріпжегіш әріптес, оқи бер қорықпа, сені балағаттайтын ешнәрсе жазғам жоқ деген сеніммен өмірдегі және интернеттегі пікірталастарда қолдануы оңай,  жатталуы ыңғайлы әмбебап жауаптардың бірін ортаға салмақпын.

Өзінің өмір жасын ең басты тірек етушілер өмірімізде де көп.

Себебі, бұл дәйекпен, әсіресе реал өмірде келіспеу мүмкін емес.

Ия, қазақ үлкенді сыйлаған халық. Бәлкім сондықтан да болар, әлгі «үлкендер» қазақтың осы қасиетін өз пайдасына жақсы пайдалана біледі. Оған тіпті өз арамызда жүрген блоггерлер арасында да мысал көп. Бәлкім бұндай адамдар кішілеу кезінде «Ей салага, алдымен әпшуіңе түк  өсіріп ал, содан кейін әңгіме айтасың!» —дегенді көп естіп, «Мә саған, жасың үлкен болған «жынды» екен! «Жас» болған жаман екен!» —деген  тұрақты пікір санасына жабысқан ба екен, кім біліпті?!

Қолдану түрлері:

1. Бірі екіншісіне өз ойын айтып болған соң, соңына былай қосады: Мен сенен үлкенмін, өмірден түйгенім де көбірек!(көбіне ата-аналар (тәрбиелік мақсатта) және мәмбеттер (шымшып қалу мақсатында) пайдаланады.
2. Жаңадан келген форумшы, немесе сайт мүшесі өзіне жамағат назарын аударту үшін өкшесі тесілген бір ақиқатты ашқанын айтып мәз болып жатқанда, ересектеуі оған » сенікі дұрыс емес» дейді. «Неге?» деген заңды сұраққа «Жассың әлі, кейін түсінесің» деп қысқа қайырады.
3. Сөзден жеңіле бастаған 20-шы ғасыр өкілі, сенің атыңды/нигіңді атаудың орнына «балам», «балақай», «мұрынбоқ», «брәчке», «жетілмеген жасөспірім» деген қаратпа сөздерді қолдана бастайды.
4. Мыс:  «Менің жасыма жетіп ал!», «Әлі талай сынақ бар алдыңда!», «Саспа, мен де сен сияқты болғанмын!». «Кезінде мен де солай ойлағанмын, қазір есейдім» Қызық, яғни ойынан айнымаған адам, ереже бойынша сөзсіз жеткіншектер класына жатқызылуы тиіс пе екен?

Бірақ адамның жас ерекшелігін пікірталастағы басты дәйек етіп тек «үлкендер» ғана емес, «кішілер» де ұтымды пайдалана алады.

1. Сенің орта ғасырларыңда мүмкін солай болған шығар. Қазір заман басқа.

2. Бықсыған ескішілдік. Өмірге жаңа көзқараспен неге қарамайсың?

3.  Мен жаспын. Миым сеніккінен сібежийлау ғой…

Құлақ аралық жүйке түйіні бар кез-келген қыртыңбай талай таласта шыныққан қас шешенді «тап шешеңді» дегізіп,  аузына  бетон құятын кездер көбіне осы жас мәселесін бетке басылғанда.

Бірақ хронологиялық жас пен көргендік, өмірлік тәжірибе екеуі аз-мұз байланысы болғанымен, мүлде екі түрлі ұғым екеніндігін де бір сәт  еске түсіріп қойған жақсы болар.